Connect with us
Advertisement
Advertisement

Cymraeg

Satish Kumar yn siarad yn Llanbedr Pont Steffan

Published

on

Jane Davidson, Cydymaith Dirprwy Is-Ganghellor dros Gynaliadwyedd ac Ymgysylltu yn PCYDDS, Satish Kumar, a Dr Tristan Nash, Uwch Ddarlithydd mewn Athroniaeth ym PCYDDS Ysgol Astudiaethau Diwylliannol

Jane Davidson, Cydymaith Dirprwy Is-Ganghellor dros Gynaliadwyedd ac Ymgysylltu yn PCYDDS, Satish Kumar, a Dr Tristan Nash, Uwch Ddarlithydd mewn Athroniaeth ym PCYDDS Ysgol Astudiaethau Diwylliannol

CAMPWS Y DRINDOD DEWI SANT yn Llambed oedd y lleoliad ar gyfer darlith wadd gan Satish Kumar, ar y testun ‘Soil, Soul, Society’, gyda 250 o bobl yn bresennol.

Ac yntau’n gyn-fynach ac ers tro byd wedi bod yn ymgyrchydd dros heddwch a’r amgylchedd, mae Satish Kumar wedi bod wrthi’n dawel yn gosod yr Agenda Fyd-eang ar gyfer newid ers dros 50 mlynedd. Dim ond naw oed ydoedd pan adawodd ei gartref teuluol i ymuno â’r Jainiaid crwydrol, a deunaw oed pan benderfynodd y gallai gyflawni mwy yn ôl yn y byd mawr, gan ymgyrchu i ddiwygio’r tir yn India a gweithio i droi gweledigaeth Gandhi o India wedi’i hadnewyddu ac o fyd heddychlon yn wirionedd.

Wrth siarad yn Neuadd y Celfyddydau ar gampws y Drindod Dewi Sant yn Llambed, ddydd Gwener 22 Ebrill, meddai Satish: “Rwyf wrth fy modd i fod nôl yng Nghymru, a minnau wedi byw yng Ngheredigion am dair blynedd.

“Mae f’atgofion am f’amser yma a’r bobl y cwrddais i â nhw yn agos iawn at fy nghalon. Mae’r campws hwn yn un hyfryd ac mae’r pynciau a addysgir yma mor ddwfn. Mae Cymru gyfan yn arwain y ffordd ym maes cynaliadwyedd ac yma mae’r gwaith yn y brifysgol hon yn cryfhau hynny ymhellach.”

Meddai Jane Davidson, Pro Isganghellor Cysylltiol (Cynaliadwyedd ac Ymgysylltu) yn y Drindod Dewi Sant: “Roedd mor braf i groesawu Satish yn ôl i Gymru a gallu dangos iddo beth mae prifysgol sy’n cymryd cynaliadwyedd o ddifrif yn ei wneud, yn ein cwricwlwm, ar ein campysau trwy newidiadau yn niwylliant y sefydliad a’r cyfleoedd newydd sydd wedi’u creu, sy’n caniatáu inni rannu ein dysg gyda’r gymuned ehangach.”

Ychwanegodd Dr Tristan Nash, Uwch Ddarlithydd mewn Athroniaeth yn yr Ysgol Astudiaethau Diwylliannol yn y Drindod Dewi Sant: “Rydym yn ddiolchgar iawn i Satish am roi anerchiad mor ysbrydoledig yn y brifysgol.”

Pwy yw Satish Kumar?

Ac yntau wedi’i ysbrydoli yn y 1920au gan enghraifft yr ymgyrchydd heddwch o Brydain, Bertrand Russell, cychwynnodd Satish ar bererindod heddwch 8,000 o filltiroedd gydag E.P. Menon. Heb unrhyw arian yn eu pocedi a chan ddibynnu ar garedigrwydd a lletygarwch pobl ddieithr, fe wnaethon nhw gerdded o India i America, trwy Foscow, Llundain a Pharis, i drosglwyddo pecyn syml o ‘de heddwch’ i arweinwyr pedwar pŵer niwclear y byd.

Yn 1973 ymsefydlodd Satish yn y Deyrnas Unedig i ymgymryd â swydd golygydd cylchgrawn Resurgence, swydd y mae wedi’i dal oddi ar hynny, sy’n golygu mai ef sydd wedi gwasanaethu hiraf yn y DU fel golygydd yr un cylchgrawn.

Yn ystod y cyfnod hwn, bu’n brif ysgogydd nifer o fentrau ecolegol ac addysgol mawr eu parch yn rhyngwladol yn cynnwys Coleg Schumacher yn Ne Dyfnaint lle mae’n dal i fod yn Gymrawd Ymweliadol.

Yn ei 50fed blwyddyn, aeth Satish ar bererindod arall – eto heb arian yn ei boced. Y tro hwn cerddodd 2,000 o filltiroedd i fannau cysegredig Prydain, menter a ddisgrifiodd fel dathliad o’i gariad at fywyd a natur.

Ym mis Gorffennaf 2000 dyfarnwyd iddo Ddoethuriaeth Anrhydeddus mewn Addysg gan Brifysgol Plymouth. Ym mis Gorffennaf 2001, derbyniodd Ddoethuriaeth Anrhydeddus mewn Llenyddiaeth gan Brifysgol Lancaster. Ac ym mis Tachwedd yr un flwyddyn, cyflwynwyd iddo Wobr Ryngwladol Jamnalal Bajaj am Hyrwyddo Gwerthoedd Gandhi Dramor.

Mae ei hunangofiant, No Destination, a gyhoeddwyd gyntaf gan Green Books yn 1978 wedi gwerthu dros 50,000 o gopïau. Mae hefyd yn awdur You Are, Therefore I Am: A Declaration of Dependence a The Buddha and the Terrorist.

Yn 2005, roedd Satish yn westai i Sue Lawley ar y rhaglen Desert Island Discs ar Radio 4. Yn 2008, yn rhan o’r gyfres Natural World ar BBC2, cyflwynodd raglen ddogfen 50 munud o Dartmoor, Earth Pilgrim, a wyliwyd gan dros 3.6 miliwn o bobl. Mae hefyd yn ymddangos yn rheolaidd ar y cyfryngau, ar nifer o raglenni yn cynnwys Thought for the Day a Midweek.

Mae Satish ar Fwrdd Cynghori Our Future Planet, cymuned ar-lein unigryw sy’n rhannu syniadau ar gyfer newid gwirioneddol, ac i gydnabod ei ymrwymiad i les anifeiliaid a byw’n dosturiol, fe’i etholwyd yn ddiweddar yn is-lywydd gyda’r RSPCA. Mae’n parhau i addysgu a rhedeg gweithdai ar ecoleg barchus, addysg gyfannol a symlrwydd gwirfoddol ac mae galw mawr amdano fel siaradwr yn y DU a thramor.

Continue Reading
Click to comment

Leave a Reply

Your email address will not be published. Required fields are marked *

Cymraeg

Mae y byd yn dod i Langollen

Published

on

“Y byd yn uno mewn dathliad lliwgar a llawen”: Yn Eisteddfod Ryngwladol Llangollen

BOB BLWYDDYN mae’r byd yn dod i Langollen, tref fechan yng ngogledd-ddwyrain Cymru, gan drawsnewid y dref gysglyd gyda môr o liw, can a dawns ar gyfer Eisteddfod Ryngwladol Gerddorol Llangollen. Os na fedrwch fod yno, bydd S4C yn dod â bwrlwm yr ŵyl i’ch ystafell fyw gyda darlledu byw o’r pafiliwn a rhaglenni uchafbwyntiau gyda’r nos.

Mae’r cyflwynwyr Nia Roberts a Trystan Ellis-Morris yno i’n tywys trwy’r hwyl mewn rhaglenni uchafbwyntiau nosweithiol gyda chymorth arbenigwyr i drafod a dadansoddi’r cystadlaethau corawl, dawns, unigol ac offerynnol. Un o arbenigwyr eleni fydd y soprano Elin Manahan Thomas, un o berfformwyr Gala yr Eisteddfod y llynedd a wnaeth hefyd berfformio yn ystod priodas Dug a Duges Sussex, Tywysog Harry a Meghan Markle fis Mai eleni.

Fel rhan o’r uchafbwyntiau nosweithiol bydd eitemau arbennig wedi eu ffilmio o flaen llaw yn dilyn cystadleuwyr o Gymru, Iwerddon ac Indonesia i ddangos pwysigrwydd yr Eisteddfod Ryngwladol i bobl o ddiwylliannau amrywiol o amgylch y byd.

Y cyflwynydd Morgan Jones fydd yn cyflwyno gyda Elin Llwyd yn fyw o’r maes ar brynhawn dydd Sadwrn gan roi blas o’r cyffro o amgylch y maes ac yn y dref. “Dwi wedi cael cyfle i fynd allan i gwrdd â grwp ddawns Al Zhir yn Jakarta, Indonesia, un o ddinasoedd fwya’r byd. Cawn ddod i nabod y cystadleuwyr yn yr eitemau a byddwn ni’n dilyn eu hanes wrth iddyn nhw gystadlu yn yr Eisteddfod Ryngwladol,” meddai cyn ychwanegu, “Dwi’n edrych mlaen i groesawu criw Jakarta i Gymru!”

“Bob blwyddyn dwi’n edrych ymlaen at y teimlad o frawdgarwch rhwng cenhedloedd. Dyma yw pam fod gymaint o’r cystadleuwyr yn dod nôl bob blwyddyn oherwydd ei fod yn ŵyl o fri sy’n cael ei pharchu yn rhyngwladol, ac mae pawb yn awyddus i fod yn rhan o’i hanes cyfoethog ac i fod yn rhan o’r hwyl sydd i’w gael ar y maes ac yn y dref,” meddai Morgan.

Bydd yr wythnos yn gorffen gyda crescendo ar nos Sadwrn wrth i enillwyr y corau ieuenctid, cymysg, merched, dynion a’r categorïau agored cystadlu am deitl mawreddog Côr y Byd 2018, tlws Luciano Pavarotti a gwobr ariannol gwerth £3,000.

Ymunwch â ni yn n fechan Llangollen am wledd o gerddoriaeth a dawns wrth i’r Eisteddfod Ryngwladol dod a’r byd yn un am wythnos arbennig.

Continue Reading

Cymraeg

Eglwys Madagascar yn ymweld â Cheredigion

Published

on

Dwy gan mlynedd o bartneriaeth: Pwysigion o Fadagascar gydag aelodau Cyngor Sir Ceredigion

AR DDYDD Iau, 7 Mehefin, cwrddodd nifer o bwysigion o Fadagascar gydag aelodau Cyngor Sir Ceredigion fel rhan o ddathliadau y cafodd eu cynnal yng Ngheredigion i ddathlu deucanmlwyddiant o’r cenhadon cyntaf a deithiodd o ardal Aberaeron i Fadagascar.

Ymwelodd y pwysigion o Fadagascar, gan gynnwys Mr Marc Ravalomanana, cyn-Lywydd Madagascar a Chadeirydd Pwyllgor Dathliadau Deucanmlwyddiant Eglwys Iesu Grist ym Madagascar (FJKM), Ceredigion dros gyfnod o ddiwrnodau. Fe wnaethant fynychu cyngherddau dathlu a gweld arddangosfeydd a oedd yn arddangos coffau o ymdrechion ac etifeddiaeth y cenhadwyr o gapel Neuaddlwyd a sefydlodd eglwys ar ynys Madagascar 200 mlynedd yn ôl – eglwys sy’n llwyddiannus ac yn cael ei fynychu’n dda hyd heddiw.

Dywedodd Cadeirydd y Cyngor, y Cynghorydd Hag Harris, a gyflwynodd Mr Ravalomanana gyda plac o crest y Cyngor, “Roedd yn anrhydedd i groesawu’r ymwelwyr o Fadagascar i Geredigion a chlywed sut wnaeth y cenhadwr hwylio a sefydlu eglwys yno, sy’n dal i fod yn gryf heddiw. Mae cyfleoedd fel hyn yn ein galluogi ni i adlewyrchu a dathlu ar y cysylltiadau sydd gan ein sir ni gyda lleoedd ledled y byd a’r cyfraniadau cadarnhaol y gallwn eu darparu i eraill.”

Continue Reading

Cymraeg

Cyhoeddi ‘geiriadur’ o Enwau Lleoedd Cymru

Published

on

'Un gam o’r ffordd': Dai Lloyd, AC

BYDD RHESTR gynhwysfawr o enwau lleoedd Cymru yn cael ei chyhoeddi gan Gomisiynydd y Gymraeg ar 20 Mehefin, fydd yn cynnig sillafiad safonol ar gyfer enwau pentrefi, trefi a dinasoedd yng Nghymru.

Mae’r rhestr, fydd ar gael ar-lein ar wefan Comisiynydd y Gymraeg, yn cael ei disgrifio fel ‘geiriadur’ i wirio sut i sillafu enwau lleoedd. Mae bron i 3,000 o enwau ar y rhestr, ac mae’n ffrwyth blynyddoedd o waith ymchwil ac ymgynghori yn y maes.

Yn ystod wythnos Eisteddfod yr Urdd eleni bu’r Comisiynydd yn gofyn i ymwelwyr brofi’r rhestr ddigidol ar ei stondin. Erbyn diwedd yr wythnos roedd dros 750 o binnau wedi eu rhoi ar y map yn nodi fod enw tref neu bentref wedi ei wirio ac mae unrhyw enwau oedd yn ymddangos ‘ar goll’ wrthi’n cael eu hychwanegu at y rhestr.

Dywedodd Comisiynydd y Gymraeg, Meri Huws, “Rydym yn hynod o falch ein bod bellach mewn sefyllfa i gyhoeddi rhestr safonol o enwau lleoedd yng Nghymru. Mae’r digwyddiad hwn yn benllanw blynyddoedd o waith ymchwil gan ein tîm bychan o fewn Comisiynydd y Gymraeg mewn ymgynghoriad â phanel o arbenigwyr ar enwau lleoedd. Rydym yn ddiolchgar iawn i’r arbenigwyr hyn am eu cyfraniad anhepgor at y prosiect hwn yn sicrhau bod sail gadarn i bob un o’r argymhellion.

“Mae gan lawer ohonom farn bersonol am sut i ysgrifennu enwau lleoedd yn ein milltir sgwâr ac mae’n bosibl na fydd pawb yn cytuno â phob argymhelliad ar y rhestr. Nid gorfodi yw ein bwriad, ond yn hytrach argymell, a cheisio sicrhau bod cysondeb yn y modd yr ydym yn sillafu enwau lleoedd yng Nghymru mewn cyd-destunau swyddogol.”

Un o’r sefydliadau sydd eisoes wedi cyhoeddi y byddant yn gwneud defnydd o’r rhestr newydd yw’r Arolwg Ordnans.

Yn ôl Pam Whitham, Rheolwr Perthnasau’r Arolwg Ordnans, “Mae gennym bartneriaeth werthfawr â swyddfa Comisiynydd y Gymraeg, ac maen nhw wedi chwarae rôl allweddol wrth i ni ddatblygu ein Polisi Enwi Cymraeg a sicrhau cysondeb o ran enwau lleoedd yng Nghymru yn ein holl gynnyrch. Rydym yn falch iawn o fod yn parhau i weithio â’r Comisiynydd ac yn croesawu’r rhestr hon fel adnodd gwerthfawr i ddiffinio enwau lleoedd yng Nghymru.”

Bydd y rhestr yn cael ei lansio mewn digwyddiad ym Mae Caerdydd, dan nawdd Dr Dai Lloyd AC. Gwnaeth Dr Dai Lloyd ymgais ym Mawrth 2017 i gyflwyno mesur fyddai’n diogelu enwau lleoedd yng Nghymru, ond pleidleisiodd y Cynulliad yn erbyn y cynnig ar y pryd.

Dywedodd Dr Lloyd, “Mae rhoi’r enwau ar gof a chadw ar restr fel hon yn mynd gam o’r ffordd at sicrhau bod y ffurfiau safonol yn cael eu cofnodi a’u parchu. Er mwyn gwirioneddol ddiogelu’r enwau lleoedd, a sicrhau na ddaw enwau eraill i gymryd eu lle’n fympwyol, credaf bod angen statws cyfreithiol i’r rhestr hon, fel sydd wedi digwydd mewn nifer o wledydd eraill.”

Wrth safoni enwau lleoedd, mae’r panel o arbenigwyr wedi bod yn dilyn canllawiau pendant. Maent yn talu sylw i ynganiad a tharddiad yn ogystal â defnydd lleol a defnydd hanesyddol o’r enw.

Mae Dr Dylan Foster Evans o Brifysgol Caerdydd yn aelod o’r panel. Dywedodd, “Mae enwau lleoedd yn rhan o’n treftadaeth a’n hunaniaeth – dyna pam y mae cymaint ohonom â diddordeb byw ynddynt. Dim ond yn yr ugeinfed ganrif y cafodd system sillafu’r Gymraeg ei safoni’n drylwyr. Bu enwau lleoedd yn araf deg yn dilyn y drefn honno: mae sillafiad megis Caernarvon yn edrych yn Seisnig a dieithr inni heddiw, ond dyna’r ffurf sydd ar gadair Eisteddfod Genedlaethol 1935!

“Nid mater du a gwyn yw sillafu enwau lleoedd, ac nid pawb a fydd yn cytuno â phob argymhelliad. Ond mae cytuno ar ffurfiau safonol mewn cronfa fel hon yn rhywbeth hanfodol os yw’r Gymraeg i fod yn iaith fodern ac addas ar gyfer yr oes ddigidol sydd ohoni.”

Bydd y rhestr ar gael i’w chwilio a’i lawrlwytho o dan drwydded agored ar wefan Comisiynydd y Gymraeg: https://bit.ly/2tjAvOG.

Continue Reading

Popular This Week