Connect with us
Advertisement
Advertisement

Cymraeg

Gwyndaf Evans ar bwysigrwydd Rali Cymru GB

Published

on

GYDA MWY o yrwyr rali rhyngwladol yn cymryd rhan yn Rali Cymru GB eleni nag erioed o’r blaen, mae’r rali bellach yn cael ei hystyried fel un o’r pwysicaf ym Mhencampwriaeth Rali’r Byd, yn ôl cyn-bencampwr Rali Prydain, Gwyndaf Evans.

Bydd 77 o yrwyr yn cystadlu dros y penwythnos, wrth iddyn nhw rasio mewn 21 cymal ar hyd siroedd Conwy, Dinbych, Fflint, Meirionnydd, Powys a Cheredigion. Ar ddiwedd pob diwrnod o’r rali, o ddydd Iau, 26 Hydref hyd at ddydd Sul, 29 Hydref, bydd criw Ralïo+ yn darlledu uchafbwyntiau cymalau’r dydd, cyn dangos uchafbwyntiau o’r rali gyfan yn ogystal â’r rali Cenedlaethol, nos Lun, 30 Hydref.

Hefyd, bydd y cyflwynwyr, Emyr Penlan, Hana Medi, Llinos Lee a Howard Davies yn dadansoddi’r rali bob nos yng nghwmni’r gyrrwr ifanc o Fachynlleth, Osian Pryce, a’r cyn-yrrwr o Ddolgellau, Gwyndaf Evans, sydd hefyd yn dad i’r gyrrwr, Elfyn Evans. Cawsom sgwrs gyda Gwyndaf wrth iddo edrych ymlaen at y rali eleni.

Beth mae gyrwyr yn ei fwynhau fwyaf am Rali Cymru GB?

Mae o’n rali boblogaidd iawn dros y byd a chyn belled ag y mae entries yn y cwestiwn, un o’r mwyaf. Mae bob un o enwau mawr y gamp yn rhoi Rali Cymru ar dop ei restr. Mae hynny’n credit i’r trefniant ac i gynnwys y cymalau a beth mae coedwigoedd Cymru yn cyfrannu at y cyfan. Mae Rali Cymru yn un o’r cryfaf ym Mhencampwriaeth y Byd a bob blwyddyn mae canlyniad y Bencampwriaeth gyfan yn y fantol erbyn i’r gyrwyr gyrraedd Cymru. Felly mae ‘na lot o bwysau ar y rali sy’n gwneud pethau’n gyffrous a dweud y lleiaf.

Ar hyn o bryd, mae’r ras am Bencampwriaeth y Byd i’r gwneuthurwyr a’r gyrwyr yn dal yn agored. Sebastien Ogier ac M-Sport yw’r ceffylau blaen yn y Pencampwriaethau yma ond fyddan nhw ddim eisiau gwneud camgymeriad. Mae’r cymalau yn gallu bod yn llithrig ac yn her fawr i’r gyrwyr.

Pa mor wahanol yw’r gamp ers i chi ddechrau eich gyrfa fel gyrrwr?

Mae’r gamp wedi mynd i fyny ac i lawr dros y blynyddoedd. Roedd hi’n boblogaidd iawn yn ystod cyfnod Colin McRae a Richard Burns ac wedyn mae o ‘di bod trwy gyfnod lle mae’n mynd i lawr dipyn. Ond yn sicr eleni efo’r gyrwyr o Brydain ac Iwerddon, Kris Meeke, Craig Breen ac Elfyn, mae pethau’n edrych i fyny eto. Maen nhw ‘di dod â cheir newydd allan hefyd ac maen nhw’n dipyn mwy o anifeiliaid o ran golwg, cyflymdra, sŵn a phob dim arall. Mae hynny wedi ychwanegu mwy o gyffro.

Beth yw eich barn chi ar dymor Elfyn hyd yma?

Mae hwn wedi bod yn dymor da i Elfyn. Mae o wedi creu argraff ar y Bencampwriaeth mewn sawl rali, ond yn enwedig ar ôl iddo ddod yn ail yn yr Ariannin a’r Ffindir. Mae hynny wedi rhoi hyder iddo yn sicr. Dwi’n teimlo ei fod o wedi symud i fyny gêr a phob lwc iddo i’r dyfodol.

Pa mor hyderus ydy Elfyn wrth baratoi ar gyfer Rali Cymru GB eleni?

Mae’r rali yma’n siwtio Elfyn ac efo’r car a’r tîm sydd ganddo, alla i ddim gweld pam na allai fo fod yn llwyddiannus yn y rali. Yn sicr, os bydd y tywydd yn llithrig ac yn wlyb, fe allith o fod yno gyda’r gorau. Mae ganddo siawns dda ac mae’n argoeli’n dda. Pan aethon ni i Sbaen, doedden ni ddim yn disgwyl llawer ond ‘da ni’n mynd i’r rali yma’n obeithiol.

Continue Reading
Click to comment

Leave a Reply

Your email address will not be published. Required fields are marked *

Cymraeg

Noson hudolus yn Llyfrgell Aberystwyth

Published

on

Cynhaliwyd Noson Llyfrau Harry Potter yn Llyfrgell Aberystwyth ddydd Gwener, 07 Chwefror. Hon oedd y bedwaredd noson o’r fath.

Ar ôl iddi nosi, roedd hi’n amser i edmygwyr y llyfrau ddathlu’r gyfres eiconig gyda digwyddiadau ledled y byd.

Cynhaliodd Gwasanaeth Llyfrgell Ceredigion y digwyddiad yn Llyfrgell Tref Aberystwyth, ac addurnwyd y llyfrgell gyda phob math o bethau sy’n gysylltiedig â Harry Potter.

Trefnwyd y noson gan Emyr Lloyd a Delyth Huws, Llyfrgellwyr Cynorthwyol. Roeddent yn falch iawn â llwyddiant y noson a’r nifer oedd yn bresennol yn y digwyddiad. Dywedodd Emyr Lloyd, “Rydym yn mwynhau cynnal nosweithiau Llyfrau Harry Potter. Nid oedd y bedwaredd noson o’r fath yn eithriad; mynychodd 86 o blant y digwyddiad am ddim, a derbyniwyd adborth cadarnhaol iawn. Rydym yn gobeithio y bydd digwyddiadau fel y rhain yn swyno’r hen a’r ifanc i fwynhau darllen.”

Daeth tair tylluan o Adar Ysglyfaethus Cei Newydd i’r digwyddiad, a bu Luke yn diddanu’r gynulleidfa gyda’i hud a’i ledrith. Diddanwyd y plant hefyd gyda darlleniad o un o’r llyfrau ac ardal gweithgareddau a chrefftau.

Dilynwch ddigwyddiadau Gwasanaeth Llyfrgell Ceredigion ar Facebook @llyfrgellceredigionlibrary. Y digwyddiad nesaf yw arwerthiant stoc ar 22 Chwefror rhwng 10am a 4pm yn y Bandstand yn Aberystwyth.

Continue Reading

Cymraeg

Cyffro’r ffenomenon ôl-apocalyptaidd yn dod yn fyw

Published

on

Ar nos Lun, 2 Mawrth bydd Cwmni’r Frân Wen, mewn partneriaeth â Galeri, yn dod â’r addasiad theatr o’r gyfrol ôl-apocalyptaidd gan Manon Steffan Ros i Theatr Felinfach yn rhan o’r daith o amgylch Cymru.

Does ddim amheuaeth fod Llyfr Glas Nebo wedi creu argraff syfrdanol ers ei chyhoeddi.

Ychydig dros wythnos ar ôl i’r nofel ennill Medal Ryddiaith Eisteddfod Genedlaethol Cymru yng Nghaerdydd 2018, roedd ailargraffiad yn cael ei baratoi. Aeth ymlaen i gipio gwobr driphlyg yng nghystadleuaeth Llyfr y Flwyddyn 2019 ac eleni mae hi’n nofel testun TGAU Cymraeg.

Mae’r nofel yn dilyn stori ryfeddol Siôn, ei fam Rowenna, a’i chwaer fach, Dwynwen wrth iddynt geisio goroesi ar ôl Y Terfyn – hunllef a gafodd effaith ddychrynllyd ar drigolion pentref Nebo a thu hwnt.

Tara Bethan sy’n chwarae rhan y fam, Rowenna, gydag Eben James yn chwarae’r mab, Siôn. Meddai Tara: “Mae cael bod yn rhan o addasu Llyfr Glas Nebo i’r llwyfan yn anrhydedd mawr i mi – does ddim amheuaeth mai hon yw un o’r nofelau Cymraeg mwyaf cyffrous yn ystod y blynyddoedd diwethaf.”

Wrth i’r llwch lonyddu ar ôl apocalyps niwclear, mae Rowenna a’i phlant Siôn a Dwynwen yn wynebu byd lle mae bywyd yn diflannu’n gyflym. Cofnodir eu stori mewn llyfr bach glas wrth i’r teulu geisio goroesi’r digwyddiad dychrynllyd.

Mae Llyfr Glas Nebo yn stori am fywyd, marwolaeth a gobaith. Mi fyddwch chi’n chwerthin. Mi fyddwch chi’n crio. Ond yn fwy na dim, mi fyddwch chi’n cwestiynu sut rydyn ni’n byw, caru a gofalu am ein byd o’n cwmpas ni heddiw. Mae Cwmni’r Frân Wen a Galeri yn hynod o falch i ddod â nofel ddirdynnol Manon Steffan Ros i’r llwyfan.

Mae tocynnau yn mynd yn gyflym felly cysylltwch â’r Swyddfa Docynnau ar 01570 470697 neu archebwch ar-lein ar theatrfelinfach.cymru. Mae tocynnau’n £12 i oedolion, £10 i bensiynwyr ac aelodau ac £8 i fyfyrwyr, bobl ifanc a phlant. Y canllaw oedran yw 12+.

Continue Reading

Cymraeg

Disgyblion Ceredigion yn clywed profiadau goroeswr yr Holocost

Published

on

I nodi Diwrnod Cofio’r Holocost, cafodd ddisgyblion Ceredigion y cyfle i glywed hanes goroeswr yr Holocost.

Ar 27 Ionawr 2020, roedd hi’n 75 mlynedd ers rhyddhau gwersyll crynhoi a marwolaeth y Natsïaid Auschwitz-Birkenau. Roedd Dr Martin Stern MBE yn bump oed pan gafodd ei arestio yn ei ysgol.

Roedd ei daith yn un anodd gyda nifer o adegau lle’r oedd yn agos at farwolaeth. Symudodd Dr Stern i Brydain yn 1950 gan ddod yn Ddoctor. Y dyddiau yma, mae Dr Stern yn addysgu pobl ifanc am yr hyn a ddigwyddodd. Ar 29 Ionawr 2020, daeth i Aberaeron i siarad gyda llond neuadd o bobl ifanc Ceredigion.

Dywedodd Meinir Ebbsworth, Swyddog Arweiniol Corfforaethol Ysgolion, “75 mlynedd yn ôl, gwelodd y byd ddelweddau o bobl yn dod allan o’r gwersylloedd a dod i delerau gyda’r hyn a oedd wedi digwydd. Rydym mor ddiolchgar i Dr Martin Stern am ddod i Geredigion i rannu ei stori a’i brofiadau. Nid hawdd mae’n siwr yw siarad am amser tywyll iawn yn hanes y byd. Rwy’n gobeithio bod ein disgyblion ni wedi ystyried yr hyn yr oeddem wedi ei glywed. O’r tawelwch llethol oedd yn yr ystafell pan oedd Dr Stern yn siarad, rwy’n credu iddynt werthfawrogi’r prynhawn yn fawr.”

Roedd y prynhawn wedi ei drefnu ar y cyd rhwng gwasanaeth ysgolion Cyngor Sir Ceredigion a ERW.

Continue Reading

Popular This Week