Connect with us
Advertisement
Advertisement

Cymraeg

Mae BBC Radio Cymru 2 wedi lansio

Published

on

Eich cymheriad brewcast ar BBC RC2: Heledd Siôn y cyflwynydd newyddion, Huw Stephens, Caryl Parry Jones, Dafydd Meredydd, Lisa Gwilym

MAE’N ddiwrnod hanesyddol ym maes darlledu Cymraeg.

O Dydd Llun, 29 Ionawr, BBC Radio Cymru 2 – gwasanaeth radio Cymraeg newydd y BBC – yn wedi ar yr awyr.

Am y tro cyntaf ers i BBC Radio Cymru gael ei sefydlu 40 mlynedd yn ôl, bydd gwrandawyr yn cael dewis o raglenni Cymraeg yn y bore. Bydd y Post Cyntaf yn dal i gynnig newyddion ac i ddadansoddi, tra bydd y Sioe Frecwast, y rhaglen amser brecwast ddyddiol newydd ar BBC Radio Cymru 2, yn darparu rhaglen amgen i deuluoedd gydag adloniant, cerddoriaeth a sgyrsiau yn y Gymraeg.

SUT I WRANDO AR BBC RADIO CYMRU 2

Mae BBC Radio Cymru 2 ar gael ar radio digidol. Bydd llawer o setiau digidol yn diweddaru’n awtomatig ac yn darganfod BBC Radio Cymru 2 heb gymorth. Fel arall, gall gwrandawyr ddewis yr opsiwn Tiwnio neu Sganio’n Awtomatig i ychwanegu BBC Radio Cymru 2 at eu rhestr o orsafoedd radio.

Gallwch wrando ar y Sioe Frecwast yn fyw – ac ar unrhyw rifyn o’r 30 diwrnod diwethaf – ar ap BBC iPlayer Radio ac ar bbc.co.uk/radiocymru2
Bydd BBC Radio Cymru 2 ar y teledu: Freeview, YouView, BT TV, a Talk Talk TV – sianel 721; Sky, sianel 0154; Freesat, sianel 718 (a 735 y tu allan i Gymru).

Dywedodd Tony Hall, Cyfarwyddwr Cyffredinol y BBC: “Rwy’n falch iawn bod y Siarter newydd wedi’n galluogi ni i gryfhau ein gwasanaethau ar gyfer cynulleidfaoedd Cymraeg ac i gynnig dewis gwirioneddol i’n gwrandawyr radio am y tro cyntaf yn y Gymraeg.”

Dywedodd Betsan Powys, Golygydd BBC Radio Cymru: “O Dydd Llun ymlaen, gall gwrandawyr ledled Cymru sydd eisiau gwrando ar wasanaeth radio Cymraeg ddewis – newyddion, chwaraeon a digon o ddadansoddi gyda thîm y Post Cyntaf ar BBC Radio Cymru neu’r Sioe Frecwast ar BBC Radio Cymru 2.

“Mae 40 mlynedd ers i’r BBC roi ei ffydd mewn darlledu Cymraeg a lansio BBC Radio Cymru. A dyma ni unwaith eto – cam hyderus arall, yn cael ei gymryd yn 2017, gyda dewis go iawn ar yr awyr yn 2018. Dydy’r broses o gael BBC Radio Cymru 2 ar yr awyr heb fod yn hawdd – diolch i bawb a wnaeth helpu i sicrhau bod hynny’n digwydd.”

Mae mudiad iaith wedi croesawu lansiad Radio Cymru 2 gan ddweud ei fod yn ‘gam yn y cyfeiriad iawn’ a bod angen datganoli pwerau darlledu i Gymru er mwyn normaleiddio’r Gymraeg ar draws y cyfryngau.

Meddai Aled Powell, Cadeirydd Grŵp Digidol Cymdeithas yr Iaith: “Mae’n adeg i ddathlu’r cam yma i’r cyfeiriad iawn, cam tuag at sicrhau bod pawb yn gallu dewis byw eu bywydau yn Gymraeg. All un orsaf ddim bod yn bopeth i bawb, felly rydym yn croesawu bod mwy o amrywiaeth o ran cynnwys fel bod gan wrandawyr rhywfaint o ddewis. Mawr obeithiwn y daw cadarnhad y bydd yr orsaf newydd hon yn un barhaol ac yn wasanaeth lawn yn y pendraw. Rydym yn gwybod bod staff Radio Cymru wedi gweithio’n galed iawn ar y fenter hon ac maen nhw’n haeddu pob llwyddiant. Wrth edrych ymlaen, mae’r angen i ddatganoli darlledu yn fwy nag erioed er mwyn osgoi sefyllfa ble mae un darparwr yn dominyddu ein cyfryngau yng Nghymru, yn enwedig yn y Gymraeg.”

Ychwanegodd: “Dan y gyfundrefn bresennol o reoleiddio o San Steffan, rydyn ni’n gweld a chlywed llai a llai o Gymraeg ar ein cyfryngau lleol a masnachol. Wedi dirywiad difrifol y Gymraeg ar orsafoedd fel Radio Ceredigion a Radio Sir Gâr, mae gwir angen atal hyn drwy ddatganoli grymoedd darlledu i’r Senedd yng Nghymru.

“Mae’r ddogfen ymchwil rydyn ni wedi cyhoeddi yn dangos drwy ddatganoli darlledu y bydd modd buddsoddi degau o filiynau o bunnau’n fwy yn darlledu yng Nghymru, gan sefydlu tair gorsaf radio a thair sianel teledu Cymraeg yn ogystal â chynnal rhai dwyieithog. Felly mae’r ymgyrch dros ragor o wasanaethau yn parhau. Os ydym am gael gwasanaethau teilwng i Gymru a’r Gymraeg, a’r rheini gan blwraliaeth o ddarparwyr, mae’n rhaid i bobl Cymru allu llywio ein system gyfryngol ein hunain.”

Continue Reading
Click to comment

Leave a Reply

Your email address will not be published. Required fields are marked *

Cymraeg

Pobl ifanc yn cymryd rhan mewn diwrnod cymdeithasol cyfrwng Cymraeg

Published

on

Ar ddydd Sadwrn 15 Chwefror, daeth dros hanner cant o bobl ifanc de Ceredigion at ei gilydd yng Ngwersyll yr Urdd, Llangrannog ar gyfer diwrnod ‘Ti’n Gêm?’. Gêm gymdeithasol trwy gyfrwng y Gymraeg a drefnwyd gan Cered: Menter Iaith Ceredigion gyda chydweithrediad yr Urdd a Tatl Gaming.

Bwriad y diwrnod oedd rhoi cyfle i bobl ifanc ddod at ei gilydd i gymdeithasu a mwynhau amrywiol weithgareddau gan gynnwys gemau cyfrifiadurol a hynny oll trwy gyfrwng y Gymraeg. Trwy gynnal diwrnod o’r math y gobaith yw bod plant yn sylweddoli eu bod yn medru defnyddio’r Gymraeg ym mhob agwedd o fywyd.

Yn ystod y dydd bu cyfle i chwarae gemau cyfrifiadurol Splatoon, FIFA a Minecraft yn ogystal â chymryd rhan mewn twrnamaint Mario Kart 8 cyn profi cyffro saethyddiaeth, y wal ddringo a’r cwrs rhaffau uchel.

Dywedodd Rhodri Francis, Swyddog Datblygu Cered: “Bu’r diwrnod yn llwyddiannus tu hwnt gyda phawb i weld yn mwynhau. Roedd ymateb y plant i’r gweithgareddau yn ffantastig a’r hyn oedd yn allweddol oedd eu bod nhw’n mwynhau trwy gyfrwng y Gymraeg. Y gobaith yw cynnal diwrnodau tebyg yn y dyfodol. Diolch i Tatl Gaming am gydweithio gyda ni a hefyd i’r Urdd am drefnu cyfres o ddigwyddiadau ymarferol i’r plant.”

Mae Cered yn cynnal amrywiaeth o weithgareddau ar draws y Sir fel bod pobl o bob oedran yn cael y cyfle i gymdeithasu trwy gyfrwng y Gymraeg. Am fwy o wybodaeth am weithgareddau yn eich ardal chi cysylltwch â Cered ar 01545 572350 neu cered@ceredigion.gov.uk.

Continue Reading

Cymraeg

Arwain y ffordd mewn rheoli cynllunio

Published

on

Mae un o Swyddogion allweddol Ceredigion yn arwain y ffordd wrth rannu sut beth yw cael gyrfa ym maes cynllunio.

Russell Hughes-Pickering yw Swyddog Arweiniol Corfforaethol Cyngor Sir Ceredigion ar gyfer yr Economi ac Adfywio, ac mae hyn yn cynnwys bod yn bennaeth cynllunio. Mae wedi bod yn rhan o erthygl addysgiadol yn rhifyn mis Chwefror 2020 o ‘The Planner’, sef cylchgrawn swyddogol y Sefydliad Cynllunio Trefol Brenhinol (RTPI).

Mae Russell Hughes-Pickering yn un o’r deuddeg Swyddog Arweiniol Corfforaethol sy’n rhan o Grŵp Arweiniol y cyngor. Dywed ef fod angen i gynllunwyr fod “yn wleidyddol graff ac edrych uwchlaw cynlluniau a pholisïau”. Mae hyn yn golygu deall y sefydliad, eu rôl wrth gyflawni’r amcanion corfforaethol a meddwl yn strategol “fel y gallant weld beth yw eu rôl ar draws y gwasanaethau ac yn eu tro helpu i ddarparu gwell wasanaethau a gwell leoedd i bobl.”

Gadawodd Russell Goleg Llanymddyfri ym 1985 er mwyn gwneud gradd mewn cynllunio ym Mhrifysgol Westminster. Dechreuodd weithio fel cynlluniwr ym Mwrdeistref Hounslow yn Llundain ym 1989 cyn cael ei benodi’n swyddog arweiniol ym maes cynllunio ym 1997.

Mae erthygl yr RTPI yn archwilio gyrfaoedd prif swyddogion cynllunio ac yn ymgyrchu i benaethiaid cynllunio gael eu cynnwys yn uwch dimau rheoli awdurdodau lleol ymysg pryderon y bydd proffil cynllunio gofodol yn dirywio a bydd ei bresenoldeb corfforaethol yn lleihau.

Aeth Russell yn ei flaen i ddweud, “Po fwyaf yr wyf i wedi cael fy nghynnwys yn y gwaith o baratoi cynlluniau corfforaethol neu raglen ddatblygu’r cyngor, yr hawsaf yw hi i weld, dylanwadu, a sicrhau bod yr adran gynllunio’n cael ei chynnwys ar yr adeg iawn. Mae hyn wedi helpu i osgoi problemau pan fydd prosiectau mawr yn mynd drwy’r cam cynllunio, boed hynny’n ddatblygiad canol tref, yn newid i gartref gofal, neu’n ysgol newydd. Rwyf yn lwcus iawn fyd mod yn rhan o grŵp arweiniol gwych lle mae’r diwylliant yn canolbwyntio ar wella a helpu ein gilydd i sicrhau gwasanaethau gwell.”

Symudodd yn ôl i Aberystwyth yn 2000 ar ôl derbyn rôl y Prif Swyddog Blaen-gynllunio gyda Cheredigion, cyn dod yn Gyfarwyddwr Cynorthwyol Cynllunio yn 2006. Esblygodd y swydd hon o gylch gwaith cynllunio yn bennaf i un a oedd hefyd yn cynnwys rheoli adeiladu a materion tai. Ym mis Mai 2013, penodwyd ef yn Bennaeth Perfformiad a Gwella, yna daeth yn Bennaeth Perfformiad a’r Economi yn 2015. Ers 01 Ebrill 2018, Russell yw Swyddog Arweiniol Corfforaethol y Cyngor ar gyfer yr Economi ac Adfywio.

Pan ofynnwyd pa gyngor y byddai Russell yn ei roi i gydweithwyr iau, dywedodd ei fod yn awyddus i weld mwy o awdurdodau’n gwella’r trefniadau ar gyfer prosiectau datblygu mawr drwy sefydlu grwpiau datblygu corfforaethol a grwpiau rheoli prosiectau, a chynnwys cynllunwyr yn y grwpiau hynny. Dywedodd, “dylai cynllunwyr ifanc gymryd rhan yn y rhain cymaint â phosib fel eu bod yn cael eu cynnwys mewn ystod eang o welliannau i wasanaethau, yn cofleidio prosiectau a datblygiadau newydd, yn ceisio ffyrdd o helpu i’w datblygu a’u gwella, ac yn cymryd rhan mewn modd cadarnhaol.”

Y Cynghorydd Rhodri Evans yw’r aelod Cabinet ar gyfer yr Economi ac Adfywio, sy’n cynnwys cynllunio. Dywedodd, “Rydym yn ddiolchgar iawn i Russell am ei weledigaeth a’i lais cryf ar gyfer materion cynllunio yng Ngheredigion. Mae gan gynlluniwr ran fawr i’w chwarae wrth helpu i ddatblygu a chyflawni blaenoriaethau corfforaethol. Mae’n siapio dyfodol ein sir ar gyfer cenedlaethau’r dyfodol.”

Mae penderfyniad y cyngor i flaenoriaethu’r broses gynllunio yn dangos bod y cyngor yn gweithio tuag at gyflawni ei flaenoriaeth gorfforaethol o Hybu’r Economi a Hyrwyddo Cydnerthedd Amgylcheddol a Chymunedol.

Continue Reading

Cymraeg

Cymeradwyo cynnig ynghylch dyfodol Hen Gartref Gofal

Published

on

Yng nghyfarfod y Cabinet ar 25 Chwefror 2020, cymeradwywyd cynnig ynghylch dyfodol hen gartref gofal, Penparcau, Aberystwyth.

O ystyried yr angen parhaus am dai fforddiadwy yn y Sir, cytunodd Cabinet Cyngor Sir Ceredigion gyda’r argymhelliad i gysylltu â Landlordiaid Cymdeithasol Cofrestredig gyda’r gobaith y gellir cytuno ar werthiant o fewn 3 mis. Os nad oes modd cyflawni hyn, yna bydd y safle’n cael ei werthu ar y farchnad agored heb nodi unrhyw ddefnydd penodol.

Rhoddwyd y safle ar y farchnad i ddechrau ar ôl rhoi terfyn ar y ddarpariaeth gofal preswyl a phob gwasanaeth arall ym Modlondeb ar 31 Mawrth 2018. Rhoddwyd blaenoriaeth i brynwyr a oedd yn bwriadu defnyddio’r safle fel Cartref Nyrsio i’r Henoed Eiddil eu Meddwl, Cartref Gofal Preswyl Dementia, neu Lety i Bobl Ifanc sydd angen Tai Cymdeithasol. Er y dangoswyd diddordeb yn yr eiddo, nid oedd y darpar brynwr yn gallu bwrw ymlaen â’r gwerthiant, ac nid oedd y cais arall a dderbyniwyd yn bodloni’r defnyddiau a ffefrir.

Y Cynghorydd Rhodri Evans yw’r Aelod Cabinet sy’n gyfrifol am yr Economi ac Adfywio. Dywedodd “Siomedig oedd peidio â sicrhau gwerthiant ar gyfer un o’r defnyddiau ffafriol cychwynnol. Mae hi bellach yn amser priodol i ystyried opsiynau eraill er mwyn gwella’r apêl i brynwyr posib eraill. Gobeithio y bydd sgyrsiau rhwng Swyddogion a Landlordiaid Cymdeithasol Cofrestredig yn bositif. Rydym yn edrych ymlaen at weld yr adeilad hwn yn cael bywyd newydd. Bydd hyn yn ei dro yn helpu’r Cyngor i gyflawni ei flaenoriaethau corfforaethol o Galluogi Cydnerthedd Unigolion a Theuluoedd yn ogystal a Hybu’r Economi.”

Bydd yr arian a wneir o ganlyniad i werthu Bodlondeb yn cael ei glustnodi er mwyn buddsoddi yn y rhaglen gyfalaf ar gyfer cartrefi preswyl y Cyngor.

Continue Reading

Popular This Week