Connect with us
Advertisement
Advertisement

Cymraeg

Eisteddfod Ryng-golegol yn dychwelyd i Brifysgol Cymru y Drindod Dewi Sant

Published

on

Eisteddfod Ryng-golegol: Ar gampws yn Llanbedr Pont Steffan ym mis Mawrth

BYDD yna groeso arbennig i’r Eisteddfod Ryng-golegol (9-11 Mawrth) wrth iddi ddychwelyd i Brifysgol Cymru Y Drindod Dewi Sant am y tro cyntaf ers pum mlynedd.

Cynhelir yr Eisteddfod ei hun ar ddydd Sadwrn, 10 Mawrth ar gampws y brifysgol yn Llanbedr Pont Steffan gyda’r cystadlaethau Chwaraeon, sy’n cynnwys rygbi, pêl droed a chystadleuaeth pêl-rwyd 7 bob ochr yn cychwyn gweithgareddau’r penwythnos ar ddydd Gwener, 9 Mawrth. Yn dilyn y cystadlu yn yr Eisteddfod, bydd gig i ddilyn ar y nos Sadwrn lle bydd Y Cledrau, Fleur de Lys, Gwilym a DJ Garmon yn perfformio ac yn diddanu’r dorf.

Mae myfyrwyr Cymdeithas Gymraeg y Drindod Dewi Sant wedi bod yn brysur iawn yn paratoi a tnu ar gyfer y penwythnos. Llywydd y Gymdeithas Gymraeg yn y brifysgol yw Ifan Thomas. Dywedodd: “Yn 2013 cynhaliwyd yr Eisteddfod ar ein campws yng Nghaerfyrddin ond eleni rydym yn edrych ymlaen yn fawr at groesawu pawb i Geredigion a champws y brifysgol yn Llanbedr Pont Steffan. Mae’r penwythnos hwn yn cael ei ystyried fel un o’n prif ddigwyddiadau cymdeithasol a diwylliannol ac mae yna gyffro mawr yma yn ogystal â llawer o waith trefnu!

Hoffwn gymryd y cyfle i ddiolch i bawb sydd wedi bod ynghlwm â’r trefniadau ac i’r holl sefydliadau a busnesau lleol sydd wedi noddi’r Eisteddfod eleni. Yn benodol, hoffwn ddiolch o waelod calon i Gomisiynydd y Gymraeg am noddi ein gig ar y nos Sadwrn a diolch arbennig hefyd i Morgan a Davies, WD Lewis a’i fab, ac Evans Bros, sy’n fusnesau pwysig ac adnabyddus yn y dref a’r sir, am gefnogi’r penwythnos. Rydym yn ddiolchgar i Gangen y Coleg Cymraeg yn y brifysgol a Chanolfan Peniarth am eu cefnogaeth yn ogystal.

Ar hyd y blynyddoedd mae’r Eisteddfod wedi sicrhau llwyfan i ddatblygu talentau cannoedd o fyfyrwyr ac mae’n siŵr na fydd eleni yn eithriad. Felly, dewch i fwynhau’r cystadlu a’r cymdeithasu yn n hanesyddol Llambed!”

Sefydlwyd y campws yn Llambed yn 1822 fel Coleg Dewi Sant i ddarparu addysg ryddfrydol i aelodau’r glerigiaeth. Erbyn heddiw mae’r gymuned academaidd yn parhau i ffynnu ac mae’r portffolio a gynigir yn denu carfan ryngwladol o fyfyrwyr bob blwyddyn.

Dywedodd Mr Gwilym Dyfri Jones, Pro-Is Ganghellor Cysylltiol Prifysgol Cymru y Drindod Dewi Sant: “Rydym yn falch iawn o gael y cyfle i groesawu myfyrwyr o bob cwr o Gymru a thu hwnt i gampws hyfryd y Drindod Dewi Sant yn Llanbedr Pont Steffan. Mae’r campws yng nghanol tref farchnad hanesyddol Llambed ac yn gartref i’n darpariaeth yn y Dyniaethau.

“Yma gallwch astudio pynciau sy’n amrywio o Anthropoleg ac Archaeoleg i Astudiaethau Tsieineaidd a Hanes. Bydd yna groeso mawr i bawb yn Llambed a hoffwn longyfarch y tîm sydd wedi bod wrthi’n ddiwyd gyda’r trefniadau. Mae’n rhaid diolch yn arbennig hefyd i’r Comisiynydd a’r busnesau lleol sydd wedi bod mor barod i gefnogi’r penwythnos.”

Prif noddwr gig yr Eisteddfod Ryng-golegol eleni yw Comisiynydd y Gymraeg. Dywedodd Meri Huws: “Ar 1 Ebrill eleni fe fydd gan fyfyrwyr, am y tro cyntaf erioed, hawliau cyfreithiol i ddefnyddio’r Gymraeg wrth ddelio â’u coleg neu brifysgol. Mae’r rhain yn cynnwys hawliau i lythyrau, gwasanaeth cwnsela, ffurflenni a thystysgrifau yn Gymraeg, yn ogystal â hawliau i dwitor personol sy’n siarad Cymraeg, cyfarfodydd Cymraeg a chyflwyno gwaith ysgrifenedig yn Gymraeg.

“Bydd y gig #MAEGENIHAWL yn yr Eisteddfod Ryng-golegol yn ffordd o ddathlu’r hawliau newydd hyn a chodi ymwybyddiaeth myfyrwyr fod yr hawliau ar y ffordd. Rwy’n dymuno’n dda i’r trefnwyr ac i bawb sy’n cystadlu, ac yn edrych ymlaen at glywed sut bydd yr hawliau newydd yn gwella profiad myfyrwyr yng Nghymru.”

Continue Reading
Click to comment

Leave a Reply

Your email address will not be published. Required fields are marked *

Cymraeg

Noson hudolus yn Llyfrgell Aberystwyth

Published

on

Cynhaliwyd Noson Llyfrau Harry Potter yn Llyfrgell Aberystwyth ddydd Gwener, 07 Chwefror. Hon oedd y bedwaredd noson o’r fath.

Ar ôl iddi nosi, roedd hi’n amser i edmygwyr y llyfrau ddathlu’r gyfres eiconig gyda digwyddiadau ledled y byd.

Cynhaliodd Gwasanaeth Llyfrgell Ceredigion y digwyddiad yn Llyfrgell Tref Aberystwyth, ac addurnwyd y llyfrgell gyda phob math o bethau sy’n gysylltiedig â Harry Potter.

Trefnwyd y noson gan Emyr Lloyd a Delyth Huws, Llyfrgellwyr Cynorthwyol. Roeddent yn falch iawn â llwyddiant y noson a’r nifer oedd yn bresennol yn y digwyddiad. Dywedodd Emyr Lloyd, “Rydym yn mwynhau cynnal nosweithiau Llyfrau Harry Potter. Nid oedd y bedwaredd noson o’r fath yn eithriad; mynychodd 86 o blant y digwyddiad am ddim, a derbyniwyd adborth cadarnhaol iawn. Rydym yn gobeithio y bydd digwyddiadau fel y rhain yn swyno’r hen a’r ifanc i fwynhau darllen.”

Daeth tair tylluan o Adar Ysglyfaethus Cei Newydd i’r digwyddiad, a bu Luke yn diddanu’r gynulleidfa gyda’i hud a’i ledrith. Diddanwyd y plant hefyd gyda darlleniad o un o’r llyfrau ac ardal gweithgareddau a chrefftau.

Dilynwch ddigwyddiadau Gwasanaeth Llyfrgell Ceredigion ar Facebook @llyfrgellceredigionlibrary. Y digwyddiad nesaf yw arwerthiant stoc ar 22 Chwefror rhwng 10am a 4pm yn y Bandstand yn Aberystwyth.

Continue Reading

Cymraeg

Cyffro’r ffenomenon ôl-apocalyptaidd yn dod yn fyw

Published

on

Ar nos Lun, 2 Mawrth bydd Cwmni’r Frân Wen, mewn partneriaeth â Galeri, yn dod â’r addasiad theatr o’r gyfrol ôl-apocalyptaidd gan Manon Steffan Ros i Theatr Felinfach yn rhan o’r daith o amgylch Cymru.

Does ddim amheuaeth fod Llyfr Glas Nebo wedi creu argraff syfrdanol ers ei chyhoeddi.

Ychydig dros wythnos ar ôl i’r nofel ennill Medal Ryddiaith Eisteddfod Genedlaethol Cymru yng Nghaerdydd 2018, roedd ailargraffiad yn cael ei baratoi. Aeth ymlaen i gipio gwobr driphlyg yng nghystadleuaeth Llyfr y Flwyddyn 2019 ac eleni mae hi’n nofel testun TGAU Cymraeg.

Mae’r nofel yn dilyn stori ryfeddol Siôn, ei fam Rowenna, a’i chwaer fach, Dwynwen wrth iddynt geisio goroesi ar ôl Y Terfyn – hunllef a gafodd effaith ddychrynllyd ar drigolion pentref Nebo a thu hwnt.

Tara Bethan sy’n chwarae rhan y fam, Rowenna, gydag Eben James yn chwarae’r mab, Siôn. Meddai Tara: “Mae cael bod yn rhan o addasu Llyfr Glas Nebo i’r llwyfan yn anrhydedd mawr i mi – does ddim amheuaeth mai hon yw un o’r nofelau Cymraeg mwyaf cyffrous yn ystod y blynyddoedd diwethaf.”

Wrth i’r llwch lonyddu ar ôl apocalyps niwclear, mae Rowenna a’i phlant Siôn a Dwynwen yn wynebu byd lle mae bywyd yn diflannu’n gyflym. Cofnodir eu stori mewn llyfr bach glas wrth i’r teulu geisio goroesi’r digwyddiad dychrynllyd.

Mae Llyfr Glas Nebo yn stori am fywyd, marwolaeth a gobaith. Mi fyddwch chi’n chwerthin. Mi fyddwch chi’n crio. Ond yn fwy na dim, mi fyddwch chi’n cwestiynu sut rydyn ni’n byw, caru a gofalu am ein byd o’n cwmpas ni heddiw. Mae Cwmni’r Frân Wen a Galeri yn hynod o falch i ddod â nofel ddirdynnol Manon Steffan Ros i’r llwyfan.

Mae tocynnau yn mynd yn gyflym felly cysylltwch â’r Swyddfa Docynnau ar 01570 470697 neu archebwch ar-lein ar theatrfelinfach.cymru. Mae tocynnau’n £12 i oedolion, £10 i bensiynwyr ac aelodau ac £8 i fyfyrwyr, bobl ifanc a phlant. Y canllaw oedran yw 12+.

Continue Reading

Cymraeg

Disgyblion Ceredigion yn clywed profiadau goroeswr yr Holocost

Published

on

I nodi Diwrnod Cofio’r Holocost, cafodd ddisgyblion Ceredigion y cyfle i glywed hanes goroeswr yr Holocost.

Ar 27 Ionawr 2020, roedd hi’n 75 mlynedd ers rhyddhau gwersyll crynhoi a marwolaeth y Natsïaid Auschwitz-Birkenau. Roedd Dr Martin Stern MBE yn bump oed pan gafodd ei arestio yn ei ysgol.

Roedd ei daith yn un anodd gyda nifer o adegau lle’r oedd yn agos at farwolaeth. Symudodd Dr Stern i Brydain yn 1950 gan ddod yn Ddoctor. Y dyddiau yma, mae Dr Stern yn addysgu pobl ifanc am yr hyn a ddigwyddodd. Ar 29 Ionawr 2020, daeth i Aberaeron i siarad gyda llond neuadd o bobl ifanc Ceredigion.

Dywedodd Meinir Ebbsworth, Swyddog Arweiniol Corfforaethol Ysgolion, “75 mlynedd yn ôl, gwelodd y byd ddelweddau o bobl yn dod allan o’r gwersylloedd a dod i delerau gyda’r hyn a oedd wedi digwydd. Rydym mor ddiolchgar i Dr Martin Stern am ddod i Geredigion i rannu ei stori a’i brofiadau. Nid hawdd mae’n siwr yw siarad am amser tywyll iawn yn hanes y byd. Rwy’n gobeithio bod ein disgyblion ni wedi ystyried yr hyn yr oeddem wedi ei glywed. O’r tawelwch llethol oedd yn yr ystafell pan oedd Dr Stern yn siarad, rwy’n credu iddynt werthfawrogi’r prynhawn yn fawr.”

Roedd y prynhawn wedi ei drefnu ar y cyd rhwng gwasanaeth ysgolion Cyngor Sir Ceredigion a ERW.

Continue Reading

Popular This Week