Connect with us
Advertisement
Advertisement

Cymraeg

Cerddwyr Cylch Teifi

Published

on

Cerddwyr Cylch Teifi: Gyda Terwyn Tomos ar draeth Ceibwr

Cerddwyr Cylch Teifi: Gyda Terwyn Tomos ar draeth Ceibwr

CAWSOM daith hyfryd ym mis Hydref i ddechrau ein tymor, gyda Terwyn Tomos yn arwain.

Roedd y tywydd yn berffaith a’r cwmni’n dda!

Gan gychwyn o faes parcio Canolfan Arddio Penrallt Ceibwr aethom ar lwybr i lawr i Draeth Ceibwr, lle cawsom ychydig o’i hanes a hanes Trewyddel a tharddiad yr enw Cymraeg a Saesneg. Dysgom hefyd am y creigiau ac un planhigyn prin sy’n tyfu yno. Lan wedyn ar lwybr yr arfordir i ben y creigiau ac wedyn i weld y fryngaer o’r Oes Haearn cyn dychwelyd i’r Ganolfan. Manteisiodd llawer ohonom ar groeso caffi’r Ganolfan i gael lluniaeth a chymdeithasu.

Fis Tachwedd 12fed byddwn yn Llangrannog gydag Ian ap Dewi i’n harwain. Cychwynnwn o faes parcio Cefncwrt, wrth fynedfa Gwersyll yr Urdd (SN327 546) (yn agos i God Post SA44 6AE) am 10.30yb. Awn ar daith gylch egnïol sydd ychydig yn fwy na dwy filltir ac yn cymryd dwy awr neu dipyn yn llai. Byddwn ar lwybrau ac ar borfa gyda hanner milltir ar ffordd gul. Awn ni lan trwy Wersyll yr Urdd i gyrraedd Llwybr yr Arfordir a’i ddilyn am sbel i ben y bryn cyn cerdded i lawr ar y lôn uwchben Fferm Llochtyn. Wedyn byddwn yn ymuno â’r llwybr sy’n rhedeg ar ochr y bryn uwchben y cwm cyn mynd i lawr i’r heol fach rhwng Pontgarreg a Llangrannog. Awn yn ôl arni am ryw hanner milltir i’r man cychwyn. Yr esgyniad trwy’r daith fydd rhyw 300 troedfedd a’r rhan fwyaf ohono ar ran weddol serth o Lwybr yr Arfordir. Bydd 3 sticil a bydd angen cymryd gofal rhag llithro ar y llwybr i lawr i’r heol. Wrth gerdded, gwelwn olygfeydd da o’r pentref a’r dyffryn, a chlywed hanes y chwareli, y pentref a Gwersyll yr Urdd. Ar ôl y daith, bydd dewis eang o luniaeth ar gael yn Llangrannog i’r rhai sy eisiau.

Ym mis Rhagfyr (10fed), byddwn mewn ardal gyfagos, sef Penmorfa a Phenbryn, gan adael maes parcio Penbryn (SN 295 521) (Cod post SA44 6QL) am 10.30yb. Ein harweinwyr fydd Celia Richardson a Nigel Blake.

Ar ôl y Nadolig, 14eg o Ionawr awn i ardal Carreg Wen a Llechryd dan arweiniad Dyfed a Siân Elis- Gruffydd.

Bydd croeso cynnes i bawb ar bob taith. Am ragor o fanylion, cysylltwch â Philippa Gibson, 01239 654561, philippa.gibson@gmail.com.

Dyddiadau’r Teithiau nesaf:

• 12 Tachwedd: Llangrannog. Gadael maes parcio Cefncwrt, wrth fynedfa Gwersyll yr Urdd (SN327 546) (ardal Cod post SA44 6AE) am 10.30yb. Arweinydd: Ian ap Dewi

• 10 Rhagfyr: Penbryn a Phenmorfa. Gadael maes parcio Penbryn (SN 295 521)

• (Cod post SA44 6QL) am 10.30yb. Arweinwyr: Celia Richardson a Nigel Blake

• 14 Ionawr: Ardal Carreg Wen a Llechryd. Gadael maes parcio Capel y Bedyddwyr Cilfowyr (SN 220 421) (Cod post SA43 2PH) am 10.30yb. Arweinwyr: Dyfed a Siân Elis-Gruffydd

Continue Reading
Click to comment

Leave a Reply

Your email address will not be published. Required fields are marked *

Cymraeg

Pleser o’r Mwyaf

Published

on

DEWCH i’r Man a’r Lle yn Aberteifi i wrando ar wyth o fawrion y genedl yn cyflwyno pum peth sydd yn datgelu rhywbeth am eu hanes eu hunain, boed hynny ar ffurf hoff gerddi a darnau o ryddiaith neu wrthrychau sydd ag arwyddocâd personol.

Byddwn yn cwrdd yn fisol (heblaw Rhagfyr) rhwng Hydref a Mehefin i godi arian tuag at Eisteddfod Genedlaethol Ceredigion.

Cynhelir y cyfarfod cyntaf ar ddydd Sadwrn, 19 Hydref am 11yb tan 12.30yp yng nghwmni’r Prifardd Idris Reynolds.

Tocynnau wrth y drws £5. Te, coffi a chacen £1.

Am fwy o wybodaeth cysylltwch â Natalie Morgan (ebost: njm84@outlook.com), Helen Thomas (helenteifi@outlook.com) neu Richard Vale (riv1@aber.ac.uk).

Fe fydd y cyfarfodydd hyn yn addas i ddysgwyr profiadol, a byddwn yn paratoi taflenni geirfa i chi.

Dewch yn llu i gefnogi’r Brifwyl trwy joio mas draw!

Continue Reading

Cymraeg

Gall Cymru gael ei phweru gan ynni morol

Published

on

GALL Cymru fod yn wlad sy’n cael ei phweru gan ynni’r môr, mae Lesley Griffiths yn addo.

Mae gan ynni’r môr y potensial i fod wrth wraidd cynlluniau uchelgeisiol i Gymru fod yn wlad sy’n cael ei phweru gan ffynonellau ynni adnewyddadwy, yn ôl Gweinidog yr Amgylchedd, Ynni a Materion Gwledig, Lesley Griffiths.

Pan oedd hi’n siarad yn y Gynhadledd ar Ynni’r Môr yn Nulyn ar Dydd Llun (30 Medi), gwnaeth y Gweinidog amlinellu’r llwyddiannau mae busnesau wedi’u cael wrth alluogi ynni’r môr yn ystod y flwyddyn diwethaf, a’r buddsoddiadau yn y gadwyn gyflenwi sy’n caniatáu i hyn ddigwydd.

Rydyn ni’n cydnabod bod y sector yn ifanc iawn, felly rydyn ni wedi buddsoddi mewn deg prosiect sy’n gysylltiedig ag ynni’r môr er mwyn adeiladau capasiti ac arbenigedd yng Nghymru, meddai hi.

Cytunwyd ar dros €71 miliwn o gyllid Ewropeaidd, a fydd yn arwain at fuddsoddiadau gwerth dros €117 miliwn yng Nghymru.

Mae’r busnesau sydd wedi elwa’n cynnwys:

• Ledwood Engineering, Mainstay Marine, MarineSpace a busnesau a leolir yn Sir Benfro yng Ngorllewin Cymru. Mae’r busnesau hyn i gyd wedi manteisio ar y buddsoddiadau gwerth miliynau o bunnoedd, sydd wedi bod o fudd i’w harbenigedd technegol presennol o fewn y sector ynni a sector ynni’r môr.

• Mae Minesto wedi cwblhau prosiect i alluogi’r gwaith o gyflwyno eu technoleg ffrwd lanw Deep Green yn fasnachol yn Holyhead Deep, oddi ar arfordir gorllewinol Ynys Môn. Roedd y prosiect yn cynnwys dylunio, gosod a phrofi dyfais 500 cilowat. Mae cam nesaf y prosiect wedi derbyn €14.9 miliwn ychwanegol, a bydd yn ategu’r gwaith o ddylunio safle 80 megawat oddi ar arfordir Ynys Môn, ochr wrth ochr â dylunio dyfais maint llawn o un megawat o leiaf.

• Gwnaeth y datblygwyr ynni’r tonnau Marine Power Systems, a leolir yn Abertawe, gwblhau eu blwyddyn o dreialon a phrofion morol yn llwyddiannus yr haf hwn, ac mae eu prototeip chwarter maint, WaveSub, wedi cyrraedd ei gerrig milltir critigol. Hefyd dyfarnwyd €13 miliwn iddynt i ddylunio a chynhyrchu dyfais fwy.

Bydd Fframwaith Morol cyntaf Cymru a Fframwaith Datblygu Cenedlaethol newydd hefyd yn rhoi polisi cynllunio strategol ar gyfer defnyddio adnoddau naturiol mewn modd cynaliadwy ar y tir ac oddi arno.

Dywedodd Lesley Griffiths, Gweinidog yr Amgylchedd, Ynni a Materion Gwledig: “Rydyn ni’n benderfynol y bydd ynni’r môr yn rhan allweddol o’n cynlluniau i Gymru fod yn wlad sy’n cael ei phweru gan ffynonellau ynni adnewyddadwy. Mae cyllid gan yr Uned Ewropeaidd wedi bod yn hanfodol wrth gefnogi hyn.

“Rydyn ni wedi gosod targedau uchelgeisiol wrth inni geisio creu Cymru wyrddach lle mae adnoddau’n cael eu rheoli nid yn unig ar gyfer heddiw, ond er budd cenedlaethau’r dyfodol.

“Eleni rydyn ni wedi derbyn cyngor Pwyllgor y DU ar y Newid yn yr Hinsawdd i wneud ein targedau datgarboneiddio yng Nghymru yn fwy uchelgeisiol, wedi cyflwyno deddfwriaeth i fabwysiadu targed o 95% ar gyfer lleihau allyriadau nwyon tŷ gwydr y flwyddyn nesaf, ac rydyn ni’n archwilio sut gallwn ni osod targed o sero yn y dyfodol.

“Mae ynni’r môr a gwynt alltraeth yn rhan hanfodol o’r targedau hyn, wrth inni geisio harneisio ein hadnoddau naturiol i sicrhau manteision tymor hir ar gyfer pawb yng Nghymru.”

Gwnaeth y gweinidog hefyd annog Llywodraeth y DU i fuddsoddi mewn ynni’r môr ac ynni adnewyddadwy yng Nghymru.

Continue Reading

Cymraeg

Prifysgol Aberystwyth yn noddi Penwythnos Mawr Pride Cymru

Published

on

Prifysgol Aberystwyth yw un o brif noddwyr Penwythnos Mawr Pride Cymru sy’n cael ei gynnal yng Nghaerdydd ar 23 – 25 Awst 2019.
Dyma’r bedwaredd flwyddyn i’r Brifysgol, a gafodd ei chynnwys ymhlith 100 cyflogwr gorau’r DU am gynhwysoldeb yn y gweithle gan Fynegai Cydraddoldeb yn y Gweithle Stonewall, noddi’r digwyddiad.
Mae presenoldeb y Brifysgol yn Pride Cymru yn rhan o raglen lawn o ddigwyddiadau drwy’r flwyddyn sy’n ymwneud â rhwydwaith LGBTA Enfys Aber.
Mae gwybodaeth bellach i’w chael yn y datganiad newyddion ynghlwm neu cliciwch arlein: https://www.aber.ac.uk/cy/news/archive/2019/08/title-225387-cy.html
Continue Reading

Popular This Week