Connect with us
Advertisement
Advertisement

Cymraeg

Mae BBC Radio Cymru 2 wedi lansio

Published

on

Eich cymheriad brewcast ar BBC RC2: Heledd Siôn y cyflwynydd newyddion, Huw Stephens, Caryl Parry Jones, Dafydd Meredydd, Lisa Gwilym

MAE’N ddiwrnod hanesyddol ym maes darlledu Cymraeg.

O Dydd Llun, 29 Ionawr, BBC Radio Cymru 2 – gwasanaeth radio Cymraeg newydd y BBC – yn wedi ar yr awyr.

Am y tro cyntaf ers i BBC Radio Cymru gael ei sefydlu 40 mlynedd yn ôl, bydd gwrandawyr yn cael dewis o raglenni Cymraeg yn y bore. Bydd y Post Cyntaf yn dal i gynnig newyddion ac i ddadansoddi, tra bydd y Sioe Frecwast, y rhaglen amser brecwast ddyddiol newydd ar BBC Radio Cymru 2, yn darparu rhaglen amgen i deuluoedd gydag adloniant, cerddoriaeth a sgyrsiau yn y Gymraeg.

SUT I WRANDO AR BBC RADIO CYMRU 2

Mae BBC Radio Cymru 2 ar gael ar radio digidol. Bydd llawer o setiau digidol yn diweddaru’n awtomatig ac yn darganfod BBC Radio Cymru 2 heb gymorth. Fel arall, gall gwrandawyr ddewis yr opsiwn Tiwnio neu Sganio’n Awtomatig i ychwanegu BBC Radio Cymru 2 at eu rhestr o orsafoedd radio.

Gallwch wrando ar y Sioe Frecwast yn fyw – ac ar unrhyw rifyn o’r 30 diwrnod diwethaf – ar ap BBC iPlayer Radio ac ar bbc.co.uk/radiocymru2
Bydd BBC Radio Cymru 2 ar y teledu: Freeview, YouView, BT TV, a Talk Talk TV – sianel 721; Sky, sianel 0154; Freesat, sianel 718 (a 735 y tu allan i Gymru).

Dywedodd Tony Hall, Cyfarwyddwr Cyffredinol y BBC: “Rwy’n falch iawn bod y Siarter newydd wedi’n galluogi ni i gryfhau ein gwasanaethau ar gyfer cynulleidfaoedd Cymraeg ac i gynnig dewis gwirioneddol i’n gwrandawyr radio am y tro cyntaf yn y Gymraeg.”

Dywedodd Betsan Powys, Golygydd BBC Radio Cymru: “O Dydd Llun ymlaen, gall gwrandawyr ledled Cymru sydd eisiau gwrando ar wasanaeth radio Cymraeg ddewis – newyddion, chwaraeon a digon o ddadansoddi gyda thîm y Post Cyntaf ar BBC Radio Cymru neu’r Sioe Frecwast ar BBC Radio Cymru 2.

“Mae 40 mlynedd ers i’r BBC roi ei ffydd mewn darlledu Cymraeg a lansio BBC Radio Cymru. A dyma ni unwaith eto – cam hyderus arall, yn cael ei gymryd yn 2017, gyda dewis go iawn ar yr awyr yn 2018. Dydy’r broses o gael BBC Radio Cymru 2 ar yr awyr heb fod yn hawdd – diolch i bawb a wnaeth helpu i sicrhau bod hynny’n digwydd.”

Mae mudiad iaith wedi croesawu lansiad Radio Cymru 2 gan ddweud ei fod yn ‘gam yn y cyfeiriad iawn’ a bod angen datganoli pwerau darlledu i Gymru er mwyn normaleiddio’r Gymraeg ar draws y cyfryngau.

Meddai Aled Powell, Cadeirydd Grŵp Digidol Cymdeithas yr Iaith: “Mae’n adeg i ddathlu’r cam yma i’r cyfeiriad iawn, cam tuag at sicrhau bod pawb yn gallu dewis byw eu bywydau yn Gymraeg. All un orsaf ddim bod yn bopeth i bawb, felly rydym yn croesawu bod mwy o amrywiaeth o ran cynnwys fel bod gan wrandawyr rhywfaint o ddewis. Mawr obeithiwn y daw cadarnhad y bydd yr orsaf newydd hon yn un barhaol ac yn wasanaeth lawn yn y pendraw. Rydym yn gwybod bod staff Radio Cymru wedi gweithio’n galed iawn ar y fenter hon ac maen nhw’n haeddu pob llwyddiant. Wrth edrych ymlaen, mae’r angen i ddatganoli darlledu yn fwy nag erioed er mwyn osgoi sefyllfa ble mae un darparwr yn dominyddu ein cyfryngau yng Nghymru, yn enwedig yn y Gymraeg.”

Ychwanegodd: “Dan y gyfundrefn bresennol o reoleiddio o San Steffan, rydyn ni’n gweld a chlywed llai a llai o Gymraeg ar ein cyfryngau lleol a masnachol. Wedi dirywiad difrifol y Gymraeg ar orsafoedd fel Radio Ceredigion a Radio Sir Gâr, mae gwir angen atal hyn drwy ddatganoli grymoedd darlledu i’r Senedd yng Nghymru.

“Mae’r ddogfen ymchwil rydyn ni wedi cyhoeddi yn dangos drwy ddatganoli darlledu y bydd modd buddsoddi degau o filiynau o bunnau’n fwy yn darlledu yng Nghymru, gan sefydlu tair gorsaf radio a thair sianel teledu Cymraeg yn ogystal â chynnal rhai dwyieithog. Felly mae’r ymgyrch dros ragor o wasanaethau yn parhau. Os ydym am gael gwasanaethau teilwng i Gymru a’r Gymraeg, a’r rheini gan blwraliaeth o ddarparwyr, mae’n rhaid i bobl Cymru allu llywio ein system gyfryngol ein hunain.”

Continue Reading
Click to comment

Leave a Reply

Your email address will not be published. Required fields are marked *

Cymraeg

Gwaith adeiladu’n dechrau ar y llwybr cyd-ddefnyddio newydd rhwng IBERS a Phenrhyn-coch

Published

on

Mae’r gwaith o adeiladu ail gam y llwybr cyd-ddefnyddio newydd rhwng Bow Street a Phenrhyn-coch newydd ddechrau. Bydd y llwybr yn cael ei adeiladu yn unol â Chanllawiau Dylunio Llywodraeth Cymru ar gyfer Teithio Llesol.

Y llynedd cafodd y cam cyntaf ei gwblhau, sef llwybr newydd i feicwyr a cherddwyr rhwng Bow Street ac IBERS. Mae Cyngor Sir Ceredigion wedi sicrhau arian grant yn ystod y flwyddyn o Gronfa Teithio Llesol Llywodraeth Cymru i barhau â’r llwybr a chysylltu â Phenrhyn-coch.

Bydd y rhan fwyaf o’r berth ffawydd bresennol yn cael ei symud ac – o dan gyfarwyddyd Ecolegydd Priffyrdd y Cyngor – bydd y berth yn cael ei thorri’n isel er mwyn sbarduno’i thwf y flwyddyn nesaf gan wella’r siawns y bydd y broses drawsleoli’n llwyddiannus. Bydd clawdd newydd – lle nad oes un ar hyn o bryd – yn cael ei blannu wrth ochr y llwybr newydd a bydd yn cynnwys amrywiaeth eang o rywogaethau brodorol ac yn cael ei hau â hadau cyfoethog eu rhywogaethau.

Bydd 150 metr o glawdd newydd yn cael ei blannu gyferbyn ag adeilad newydd Campws Arloesi a Menter Aberystwyth, a fydd yn cyfrannu at gynnydd cyffredinol yn nifer y cloddiau a choed newydd a fydd yn cael eu plannu fel rhan o’r cynllun hwn.

Dywedodd y Cynghorydd Dafydd Edwards, yr Aelod o’r Cabinet dros Briffyrdd a Gwasanaethau Amgylcheddol, a Thai: “Mae swyddogion Priffyrdd y Cyngor wedi gweithio mewn partneriaeth â Phrifysgol Aberystwyth fel bod y llwybr hwn yn gallu cysylltu Penrhyn-coch â datblygiad newydd Campws Arloesi a Menter Aberystwyth ym Mhlas Gogerddan, a fydd yn cael ei gwblhau erbyn mis Awst 2020. Bydd y llwybr hefyd yn cysylltu â Gorsaf Reilffordd Bow Street y mae disgwyl iddi gael ei chwblhau ym mis Hydref eleni.

“Mae’r datblygiadau hyn yn newyddion gwych i gymunedau Penrhyn-coch a Bow Street oherwydd bydd y cynllun yn eu cysylltu’n well â gwasanaethau, cyfleusterau a gwaith yn lleol. Mae cynlluniau o’r math hwn yn helpu pobl i wneud llai o siwrneiau yn y car, gan gyfrannu’n gadarnhaol at leihau newid hinsawdd ac allyriadau CO2 a hefyd galluogi ein trigolion i fyw bywydau iachach a mwy llesol.”

Bydd y gwaith o blannu’r clawdd newydd yn cael ei wneud yn hwyrach eleni, yn ystod yr hydref, yn unol ag argymhelliad yr Ecolegydd. Bydd hyn yn cynyddu’r tebygolrwydd y bydd y plannu’n llwyddo gan ddarparu cynefin gwerthfawr yn yr hirdymor.

Continue Reading

Cymraeg

Noson hudolus yn Llyfrgell Aberystwyth

Published

on

Cynhaliwyd Noson Llyfrau Harry Potter yn Llyfrgell Aberystwyth ddydd Gwener, 07 Chwefror. Hon oedd y bedwaredd noson o’r fath.

Ar ôl iddi nosi, roedd hi’n amser i edmygwyr y llyfrau ddathlu’r gyfres eiconig gyda digwyddiadau ledled y byd.

Cynhaliodd Gwasanaeth Llyfrgell Ceredigion y digwyddiad yn Llyfrgell Tref Aberystwyth, ac addurnwyd y llyfrgell gyda phob math o bethau sy’n gysylltiedig â Harry Potter.

Trefnwyd y noson gan Emyr Lloyd a Delyth Huws, Llyfrgellwyr Cynorthwyol. Roeddent yn falch iawn â llwyddiant y noson a’r nifer oedd yn bresennol yn y digwyddiad. Dywedodd Emyr Lloyd, “Rydym yn mwynhau cynnal nosweithiau Llyfrau Harry Potter. Nid oedd y bedwaredd noson o’r fath yn eithriad; mynychodd 86 o blant y digwyddiad am ddim, a derbyniwyd adborth cadarnhaol iawn. Rydym yn gobeithio y bydd digwyddiadau fel y rhain yn swyno’r hen a’r ifanc i fwynhau darllen.”

Daeth tair tylluan o Adar Ysglyfaethus Cei Newydd i’r digwyddiad, a bu Luke yn diddanu’r gynulleidfa gyda’i hud a’i ledrith. Diddanwyd y plant hefyd gyda darlleniad o un o’r llyfrau ac ardal gweithgareddau a chrefftau.

Dilynwch ddigwyddiadau Gwasanaeth Llyfrgell Ceredigion ar Facebook @llyfrgellceredigionlibrary. Y digwyddiad nesaf yw arwerthiant stoc ar 22 Chwefror rhwng 10am a 4pm yn y Bandstand yn Aberystwyth.

Continue Reading

Cymraeg

Cyffro’r ffenomenon ôl-apocalyptaidd yn dod yn fyw

Published

on

Ar nos Lun, 2 Mawrth bydd Cwmni’r Frân Wen, mewn partneriaeth â Galeri, yn dod â’r addasiad theatr o’r gyfrol ôl-apocalyptaidd gan Manon Steffan Ros i Theatr Felinfach yn rhan o’r daith o amgylch Cymru.

Does ddim amheuaeth fod Llyfr Glas Nebo wedi creu argraff syfrdanol ers ei chyhoeddi.

Ychydig dros wythnos ar ôl i’r nofel ennill Medal Ryddiaith Eisteddfod Genedlaethol Cymru yng Nghaerdydd 2018, roedd ailargraffiad yn cael ei baratoi. Aeth ymlaen i gipio gwobr driphlyg yng nghystadleuaeth Llyfr y Flwyddyn 2019 ac eleni mae hi’n nofel testun TGAU Cymraeg.

Mae’r nofel yn dilyn stori ryfeddol Siôn, ei fam Rowenna, a’i chwaer fach, Dwynwen wrth iddynt geisio goroesi ar ôl Y Terfyn – hunllef a gafodd effaith ddychrynllyd ar drigolion pentref Nebo a thu hwnt.

Tara Bethan sy’n chwarae rhan y fam, Rowenna, gydag Eben James yn chwarae’r mab, Siôn. Meddai Tara: “Mae cael bod yn rhan o addasu Llyfr Glas Nebo i’r llwyfan yn anrhydedd mawr i mi – does ddim amheuaeth mai hon yw un o’r nofelau Cymraeg mwyaf cyffrous yn ystod y blynyddoedd diwethaf.”

Wrth i’r llwch lonyddu ar ôl apocalyps niwclear, mae Rowenna a’i phlant Siôn a Dwynwen yn wynebu byd lle mae bywyd yn diflannu’n gyflym. Cofnodir eu stori mewn llyfr bach glas wrth i’r teulu geisio goroesi’r digwyddiad dychrynllyd.

Mae Llyfr Glas Nebo yn stori am fywyd, marwolaeth a gobaith. Mi fyddwch chi’n chwerthin. Mi fyddwch chi’n crio. Ond yn fwy na dim, mi fyddwch chi’n cwestiynu sut rydyn ni’n byw, caru a gofalu am ein byd o’n cwmpas ni heddiw. Mae Cwmni’r Frân Wen a Galeri yn hynod o falch i ddod â nofel ddirdynnol Manon Steffan Ros i’r llwyfan.

Mae tocynnau yn mynd yn gyflym felly cysylltwch â’r Swyddfa Docynnau ar 01570 470697 neu archebwch ar-lein ar theatrfelinfach.cymru. Mae tocynnau’n £12 i oedolion, £10 i bensiynwyr ac aelodau ac £8 i fyfyrwyr, bobl ifanc a phlant. Y canllaw oedran yw 12+.

Continue Reading

Popular This Week